Новата партија на Ципрас веќе изби на второ место на анкетите

Алексис Ципрас, поранешен грчки премиер, деновиве се врати на грчката политичка сцена како лидер на новиот политички субјект Грчки левичарски сојуз „Елас“. Според анкета која ја пренесува „Катимерини“, оваа партија веќе е втора по популарност, зад владејачката Нова демократија, а пред ПАСОК.

Нова демократија на актуелниот премиер Константинос Мицотакис останува прва со поддршка од 23,5 проценти, но партијата на Ципрас веќе се издвојува како главна опозициска и втора политичка сила во државата, со поддршка од 12,8 проценти од гласачите. ПАСОК падна на третата позиција со 10 проценти, додека „Надеж за демократија“ е веднаш зад него со 9,5 проценти.

Податоците од анкетата покажуваат дека Ципрас најмногу црпи сила од поранешните гласачи на Сириза. Според анализата, 56 проценти од неговата поддршка доаѓа од гласачи кои во 2023 година биле со Сириза, а значителен дел пристигнува и од поширокиот левичарски простор.

Во исто време, појавата на Марија Каристијану, мајка на жртва од железничката несреќа во Темпи, дополнително го менува политичкиот пејзаж. Нејзиното движење привлекува гласачи од различни идеолошки правци, што покажува дека протестниот и антисистемскиот глас во Грција веќе не се движи само по класичната линија левица-десница, пишува „Катимерини“.

За Мицотакис, анкетата не носи непосредна закана за првото место, но носи многу посериозен сигнал: опозицијата се прегрупира. Враќањето на Ципрас може да не биде доволно за директно да ја урне доминацијата на Нова демократија, но веќе го менува прашањето кој ќе биде главниот противник на власта на следните избори.