Дескоски: Има нешто многу труло во ОЈО ГОК, споделуваат тајни податоци со јавноста!

Универзитетскиот професор Тони Дескоски е шокиран од Обвинителството за гонење на организиран криминал и корупција, бидејќи како што вели, со јавноста споделиле тајни податоци за предистрага која ја водат, а се однесува на наводната шпионска афера во претседателската вила Водно.

-Скандал на ОЈО ГОК со објавата дека се води предистражна постапка! Просто не можам да верувам во веста што е пренесена преку медиумите и интернет порталите. Обвинителството за гонење на организиран криминал ПОТВРДИЛО дека води ПРЕДИСТРАГА за шпионажа во кабинетот на Претседателката. Според Законот за кривична постапка, предистражната постапка е ТАЈНА! Ова е ноторен факт, кој му е познат на секој студент по право кој го положил КПП. Има нешто многу труло во ОЈО ГОК! Сега тоа стана очигледно. Работата многу заличува на СЈО. Еве му нова суперприоритетна задача на Обвинителот Савески! Овој скандал мора да се расчисти!, пишува професорот на Фејсбук.

Професорот го коментира случајот кој вчера го потврдија од Обвинителството за гонење на организиран криминал и корупција, односно дека веќе пет месеци водат предистражна постапка за сомнежи за недозволени активности во Кабинетот на претседателката Гордана Сиљановска-Давкова во Вила Водно.

Иако досега кога некој предмет е во предистрага од Обвинителствата не споделуваат многу детали, во овој случај не беше така.

Еве што информираа од таму:

-ОЈО ГОКК, по добиено известување на 18.12.2025 година од Министерството за внатрешни работи – Сектор за компјутерски криминал, кое се однесува на настан од 24.11.2025 година и постоење индиции за преземени недозволени активности од висок државен интерес, истиот ден отвори предистражна постапка и веднаш ги презеде сите неопходни мерки и активности согласно своите законски надлежности.

Во рамки на постапката, до Основниот кривичен суд беше доставено Барање за издавање наредба за пребарување на компјутерски систем, со цел утврдување на содржините што евентуално биле неовластено преснимени од информативниот систем во Кабинетот на Претседателката. Истовремено, беа издадени и наредби за екстракција на податоци од персонални и лаптоп компјутери доставени до МВР од Кабинетот на Претседателката, информираат од Обвинителството.

Оттаму додаваат дека дополнително, до Кабинетот на претседателката било упатено барање за доставување копии од видео записите од безбедносните камери поврзани со пријавениот настан.

-На 30.12.2025 година, до МВР – Сектор за компјутерски криминал, како надлежен орган за откривање кривични дела и обезбедување докази, беше доставена наредба за анализа на екстрахираниот доказен материјал.

На почетокот на 2026 година, по добиено известување дека Кабинетот на Претседателката не располага со копии од видео надзорот, бидејќи опремата е набавена преку СОЗР, а надлежноста за ракување и чување на записите е кај МВР, предметниот јавен обвинител се обрати и до СОЗР и до МВР за нивно итно обезбедување. Од СОЗР беше добиено известување дека институцијата не располага со видео записи, туку дека нивната надлежност се однесува исклучиво на набавка на опремата, додека чувањето и располагањето со копиите од записите е во надлежност на МВР.

И покрај тоа, од страна на МВР до денес не се доставени повратни информации, ниту известување за преземени дејствија во врска со обезбедувањето на копиите од видео надзорот.

На 16.03.2026 година, МВР достави известување за дел од преземените активности кои се однесуваат на обезбедување пристап до криптираните податоци од дотогаш екстрахираната компјутерска опрема. Воедно, до ОЈО ГОКК беа доставени и два мобилни телефони одземени од пријавениот, со барање за нивна екстракција во Истражниот центар на ОЈО ГОКК, по што веднаш беше издадена соодветна наредба за постапување.

Потоа, на 25.03.2026 година, имајќи ја предвид сериозноста и чувствителноста на предметот, јавниот обвинител до МВР – Сектор за компјутерски криминал достави наредба за анализа на податоците од мобилните телефони, како и заедничка анализа на податоците екстрахирани од компјутерската опрема обработена во Истражниот центар на ОЈО ГОКК. Дополнително, беше побарана и анализа на постапувањето по судската наредба за увид и пребарување во информативниот систем на Кабинетот на Претседателката, со задолжение до обвинителството да биде доставено известување за прибраните докази.

До денес, и покрај сериозноста на предметот, чувствителноста на околностите и значењето на навременото постапување, ОЈО ГОКК нема добиено известување од МВР за резултатите од преземените дејствија, ниту за прибраните докази, информираа од Обвинителството.