Барокна вечер во „Света Софија“ со уметниците Владимир Костов и Цветанка Созовска

Еминентните македонски уметници, виолинистот Владимир Костов и чембалистката Цветанка Созовска, вечерва ќе настапат во црквата „Света Софија“ во рамки на музичката програма на 66. издание на фестивалот „Охридско лето“.

Цветанка Созовска е родена во 1975 година во Скопје. На седумгодишна возраст започнува да учи пијано, а основното и средното музичко образование го завршува во класата на проф. Кармен Костова во МБУЦ „Илија Николовски-Луј“. Во 1996 година дипломира во класата на проф. Борис Романов на Факултетот за музичка уметност во Скопје. Со просечна оценка 10,0 е прогласена за најдобар дипломиран студент на својата генерација на ФМУ – Скопје и на Универзитетот „Св. Кирил и Методиј“.

Созовска го продолжува своето образование на Кралскиот конзерваториум во Хаг, Холандија, каде што специјализира чембало и барокна музика на Одделот за стара музика. Во класата на светски признатиот холандски чембалист и пијанист Жак Ох ги завршува додипломските и постдипломските студии по чембало, а во 2002 година се стекнува со титулата магистер по музика.

Како солист, камерен и оркестарски музичар, Созовска настапувала на бројни концерти низ Европа и во Јужна Кореја. Во сезоната 2002-2003 била член на Барокниот оркестар на Европската Унија, каде соработувала со врвни музичари, меѓу кои Фабио Бјонди и Рајнхард Гебел.

Како корепетитор, во 2004 година била дел од тимот на Летниот фестивал „Каза де Матеуш“ во Португалија, а со барокниот ансамбл „Барок опера Амстердам“ остварила турнеја низ Франција. Во 2009 година била професор по чембало и басо континуо на Летната музичка школа во Бургос, Шпанија.

Созовска настапувала и како чембалист на Оркестарот од Кадакес во Шпанија, во проект под диригентската палка на легендарниот сер Невил Маринер. Под водство на еден од најзначајните светски барокни музичари, Франс Брижeн, била корепетитор и заменик-диригент во долгогодишната продукција на операта „Les Indes Galantes“ од Жан-Филип Рамо во Полска и Холандија.

Повеќе од 20 години Созовска живее и работи во Хаг. Таа е корепетитор на чембало на Одделот за историска изведба при Конзерваториумот во Утрехт, а во истиот град е професор по чембало во Утрехтскиот центар за уметности. Повеќе од 15 години е и професор по пијано во музичкиот оддел при Интернационалното училиште во Хаг.

Владимир Костов дипломирал и магистрирал на Факултетот за музичка уметност во Скопје во класата на проф. Михајло Куфујонакис. Стручно се усовршувал кај повеќе истакнати педагози, меѓу кои Сихана Бадивуку, Благоја Димчевски, Корнелија Бронзети, Ирина Бочкова и Наталија Пришепенко.

Костов посетувал мајсторски курсеви за камерна музика предводени од светски познатите „Медичи“ квартет од Шведска, „Артемис“ квартет од Германија и „Миро“ квартет од САД.

По пат на аудиција повеќепати бил избран да членува во Светскиот оркестар на Музичката младина, со кој настапувал на турнеи во Европа, Америка и Азија, соработувајќи со врвни диригенти и солисти и настапувајќи во некои од најпознатите концертни сали во светот.

Настапувал и со оркестарот Исток-Запад во Алтенбург, Германија, а од 2000 до 2004 година бил еден од професорите по виолина во Оркестарот на ЦЕИ.

Вечерашниот концерт на Костов и Созовска во „Света Софија“ претставува средба на двајца македонски уметници со исклучително меѓународно искуство и со барокниот музички репертоар, во амбиент кој со векови е еден од симболите на музичкиот и духовниот живот на Охрид.

На програмата на концертот што ќе се одржи во црквата „Света Софија“ од 21 часот се дела на Бонпорти, Бах, Вивалди, Зографски, Верачини, Скарлати, Бибер.