Премиерот на Велика Британија – Борис Џонсон смета дека рускиот претседател Владимир Путин сака „двојно да ја засили“ својата инвазија врз Украина, бидејќи не гледа опција за излез од неа, туку има намера „да продолжи со уништувањето“.
Џонсон посочува дека среде ноќ бил разбуден за веста за руското гранатирање на украинската нуклеарна централа Запорожје, соопштувајќи дека од таквиот напад „подеднакво е загрозена“ и европската безбедност.
„Нашата безбедност е подеднакво вклучена, подеднакво загрозена од таквиот напад. Се сеќаваме што се случи со Чернобил. Радиоактивните облаци се проширија низ континентот, и колку што се сеќавам, во Северна Америка“ – рече Џонсон.
„Очигледно е дека постои ризик. Загрижен сум како ќе ја запреме катастрофата. Има и други украински капацитети и секако има и други украински радиоактивни складишта на нуклеарен отпад“ – кажа Џонсон.
Тој вели и дека Путин ја потценил подготвеноста на Украинците да се борат и да ја бранат својата земја.
„Путин, исто така, го потцени единството на Западот. Владите на сите земји претставени на оваа маса навистина работеа заедно, многу ефикасно, за да создадат пакет економски санкции што имаа многу значаен ефект врз Русија“ – додаде тој.
Џонсон додаде дека Путин е подготвен да продолжи да ја „уништува“ Украина.
„Ми се чини дека Владимир Путин одлучил, и јасно е од тоа што се случува, дека решил двојно да го засили (уништувањето). Тој не гледа излез од ќорсокакот во кој се наоѓа, освен на начин што продолжува да го уништува недолжното население во недолжните европски градови“ вели британскиот премиер.