Министерството за надворешни работи ја поздрави одлуката за отворање на граничниот премин Рафах, со што се овозможува евакуација на странските државјани, вклучително и петте државјани на Македонија.
„Нашите државјани кои се наоѓаат во Газа веќе се вклучени во списоците за евакуација и истото очекуваме наскоро да се реализира согласно околностите на терен и динамиката на евакуација, имајќи го предвид големиот број странски државјани во Газа кои се дел од оваа операција. Преку тесна и континуирана комуникација со надлежните институции на Египет и Израел како и со нашите државјани, Министерството за надворешни работи е непосредно и континуирано активно вклучен, со цел нашите државјани да бидат безбедно и навремено евакуирани“, се наведува во соопштението од МНР.
Граничниот премин Рафах се наоѓа помеѓу Египет и Газа. Катар, во соработка со САД, посредуваше во постигнувањето договор меѓу Египет, Израел и Хамас за да им се дозволи на носителите на странски пасоши и на некои тешко повредени лица да ја напуштат опколената Газа, изјави денеска за Ројтерс извор запознаен со договорот.