Меѓународната иницијатива за заштита на реките наречена „Спасете го синото срце на Европа“ објави видео од реката Неретва, која целосно побеле на дел од својот тек во Босна и Херцеговина.
„Како резултат на интензивирањето на работите на изградбата на хидроцентралата Улог на горниот тек на Неретва, во неколку наврати на делница од неколку километри угинаа риби, а на подолг дел од водотекот Неретва животот во реката замре“, соопштуваат од иницијативата со видеото.
Тие го цитираа Владимир Топиќ од Центарот за животна средина кој рече дека сцените од Неретва изгледаат како „еколошка катастрофа“.
„Водата е тотално бела и загадена, не знаеме дали се работи за некакви адитиви или нешто друго, но сигурно е дека сето тоа доаѓа од градилиштето на Х.Е. Улог. Рибите умираат во водата, а други живи суштества страдаат во и околу водата. Очигледно е како рибите скокаат од водата поради недостаток на кислород. Последиците од ова загадување секако се чувствуваат километри низводно, кон Бјелимиќи и Главатичево“, вели Топиќ.