Пронајден вториот дел од авионот на основачот на Вагнер, Евгениј Пригожин, кој се урна вчера попладне.
Локацијата на која е пронајден вториот дел од авионот може да биде многу важна за истрагата за причината за авионската несреќа во која, според официјална Москва, загинал и самиот Пригожин, човекот кој го предводеше неуспешниот бунт против руското Министерство за одбрана и, индиректно, против самиот руски претседател Путин.
Руските медиуми објавија и видео од вториот дел од авионот на Пригожин, кој се состои од крило и опрема за слетување, на кои нема траги од противвоздушен напад.
Но, особено е интересно што вториот дел од авионот е пронајден на околу три километри од местото каде што паднал поголемиот дел, односно трупот.
Растојанието помеѓу двата поголеми делови на авионот на земја значи дека е можно авионот да се преполовил релативно високо во воздухот, што пак може да биде резултат на експлозија во воздух.
Треба да се запомни и дека очевидците на падот изјавиле дека слушнале експлозија пред падот.
Локалните жители на регионот Твер вчера потврдија дека слушнале удар, а потоа виделе како авионот паѓа кон земјата. Еден жител, 72-годишниот Виталиј Степенок, рече: „Слушнав експлозија или тресок. Обично, ако има експлозија на земјата, има ехо, но тоа беше само тресок и го кренав погледот и видов бел чад. ”
„Едното крило тргна во една насока, а трупот падна“, рече тој, покажувајќи со рацете како авионот се движел кон земјата, а потоа додаде: „И потоа се лизна на едното крило. Не пропадна, се лизгаше .“
Степенок рече дека скокнал на својот велосипед и се упатил кон местото на несреќата: „Сè беше во пламен. Луѓето се шетаа наоколу. Извлекоа некого, неговите останки… Не можев да забележам. Само што го видов бројот во авионот , што им го кажав и тоа беше тоа“.
Друг локален жител, кој се претставил како Анатолиј, рече: „Што се однесува до тоа што можеше да се случи, само ќе го кажам ова: тоа не беше гром, тоа беше „метален“ тресок – така да се каже. И порано сум слушнал работи како тоа“.