Судот за злосторства на борците на ОВК во Хаг денеска го осуди поранешниот офицер на ОВК, Салих Мустафа на 26 години затвор за злосторства врз Албанците на Косово во 1999 година.
Според пресудата, Мустафа (50) е одговорен за тешки и сурови злосторства врз шестмина Албанци во притвор на ОВК во селото Злаш, недалеку од Приштина, во април 1999 година.
Судот го прогласи Мустафа за виновен по три точки од обвинението – за самоволно лишување од слобода, тортура и убиство на затвореници во Злаш.
Според пресудата, Мустафа и припадниците на ОВК, кои му се потчинети, извршиле злосторства врз албански цивили кои неоправдано ги сметале за „шпиони“, „соработници“ на српските власти или политички противници.
Петмина затвореници беа ослободени во средината на април 1999 година, а еден притвореник почина како резултат на тепање и тортура.
Во својата пресуда, советот за сослушување истакна дека сведоците и жртвите сведочеле за време на судењето „во атмосфера на заплашување и малтретирање што сè уште владее во Косово“.
Пресудата на Мустафа е првата што судот, чие официјално име е Специјализиран совет на Косово, му ја изрече на припадник на ОВК обвинет за воени злосторства.