Жосеп Борел – шефот на дипломатијата на ЕУ вели дека 140 земји-членки на ОН се согласиле за осуда на рускиот напад врз Украина, но дека позициите „остро се разликуваат“ по прашањето за „осуда на агресорот“ и „што да се прави понатаму“. Предупредува дека војната во Украина не е „само европска војна“ и оценува дека „никој не може да биде неутрален пред агресијата“.
„Во принцип, сите го осудуваат нападот врз територијалниот интегритет и суверенитет на земјата. Но, кога станува збор за именување на агресорот и наведување кој е одговорен за последиците, многумина се воздржани од различни причини. Некои се позагрижени за последиците од војната за себе отколку за тоа кој е одговорен за овие тешкотии и како да се заврши оваа војна. Други се жалат на двојни стандарди или едноставно сакаат да ги зачуваат своите добри билатерални односи со Русија. А многумина остануваат неопределени и не сакаат да заземаат страна затоа што тоа би ги загрозило нивните геополитички интереси“ – смета Борел.
Во својот блог, посветен на минатонеделниот министерски состанок на Г-20 во Бали, шефот на дипломатијата на ЕУ оценува дека мултилатералниот систем е под притисок како никогаш досега, како резултат на „подемот на политиката на моќ“.
„Ние сме сведоци на овој тренд веќе неколку години, а руската војна против Украина го доведе овој развој на сосема ново ниво. Оваа неиспровоцирана војна е очигледно кршење на меѓународното право, што е спротивно на основните принципи на Повелбата на ОН и го загрозува глобалното економско закрепнување“ – рече тој.
Борел нагласува дека на состанокот на Г20 предупредил дека „руската агресивна војна против Украина драматично ја влошува кризата со храна“ во светот, дека тоа е „намерен обид да се користи храната како оружје“ против најранливите земји во светот, особено во Африка и ги отфрли наводите дека недостигот и повисоките цени се виновни на ЕУ и меѓународните санкции против Русија.