МВР го демантира Мицкоски: Уапсеното лице кое пукаше кај „Скендербег“ не е вработено во МВР

Министерството за внатрешни работи во денешното соопштение го демантира претседателот на ВМРО-ДПМНЕ, Христијан Мицкоски, кој во интервју за српската телевизија Прва вели дека уапсеното лице кое пукаше со пиштол при инцидентот на плоштадот „Скендербег“ било вработено во МВР.

-Министерството за внатрешни работи најостро и категорично ги демантира лагите кои претседателот на ВМРО-ДПМНЕ ги изнесе на српската телевизија Прва, дека уапсеното лице кое пукаше со пиштол при инцидентот на плоштадот Скендербег било вработено во МВР, се наведува во соопштението од Министерството.

Како што МВР веќе информираше, во врска со случајот, како што нагласуваат оттаму, со брза реакција на полицијата веднаш беше приведен Е.Ј.(40) од Скопје, со што беше избегнат поголем инцидент. Предметниот пиштол му е одземен и вештачен, обезбедени се сите докази против него, а до ОЈО е поднесена кривична пријава по брза постапка за кривично дело „предизвикување општа опасност“, предвидено и казниво по член 288 од Кривичниот законик. Притоа, во соработка со ОЈО Скопје од страна на Судија на претходна постапка, против Е.Ј. е определена мерка притвор.

-Македонските медиуми го идентификуваа лицето и внимателно го следеа развојот на настаните, па обидите на Мицкоски за пласирање на лаги и дезинформации се сега насочени кон медиумите од другите држави, се наведува во соопштението.

Министерството за внатрешни работи уште еднаш апелира да не се изнесуваат лажни вести и дезинформации кои можат да доведат до забуна во јавноста, туку инсистира на точно, навремено и вистинито информирање, кое е и еден од приоритетите во работењето на ова Министерство.