Aгелер порача судиите да одолеваат на било какви влијанија и притисоци

Уставниот суд денеска соопшти дека претседателот на судот, Дарко Костадиновски остварил средба со амбасадорката на САД, Ангела Агелер, а се одржал и работен состанок со со судиите Осман Кадриу, Насер Ајдари, Добрила Кацарска, Татјана Васиќ Бозаџиева, Јадранка Дабовиќ и Ана Павловска-Данева.

Претседателот на Судот, Костадиновски ја информирал амбасадорката Агелер за приоритетите во неговиот мандат, како и за внатрешните и надворешните предизвици со кои се соочил Уставниот суд во неговото работење изминатиот период.

Костадиновски посочил дека работи засилено на враќањето на зголемување на довербата во владеењето на правото и во Уставниот суд.

Тој, најавата за пренос во живо на подготвителната седница за Законот за употреба на јазиците ја претставил како напредок во полето на транспарентноста бидејќи „претставува исклучително сензитивен предмет“.

Костадиновски, како што велат од судот, информирал дека ќе останат непоколебливи „без оглед на сите обиди за политизација и етнизација на работата“.

„Основната надлежност на Уставниот суд е да ја штити состојбата на уставност во правниот поредок. Тоа значи дека сите акти и дејствија на сите власти да бидат усогласени со Уставот. Крајно време е сите кои ѝ мислат добро на државата своите јавно изнесени заложби за посветеност на владеењето на правото да ги направат реални, а не лажни или декларативни,” изјави претседателот на Судот.

Амбасадорката Агелер ја изразила поддршката од САД за враќање на довербата во правната држава преку транспарентни постапки и одлучување исклучиво според Устав и законите. Агелер ги охрабрила судиите да одолеваат на било какви влијанија и притисоци во постапувањето и кога ќе влезат на седница да ги остават настрана сите останати улоги, а пред сè да бидат уставни судии.