Дел од членовите на Синдикатот за образование наука и култура попладнево пред седиштето на синдикатот незадоволни од одлуката штрајкот во образованието да биде ставен во мирување бараа претседателот на СОНК – Јаким Неделков да се обрати и да им ги објасни причините за овој чекор.
„Денеска се ретерира без знаење на членството и се носи одлука за која членството не е информирано. Тука сме да изразиме револт. Ние сме базата, ние сме членството и должен е Неделков да дојде и да објасни зошто ја промени одлуката“ рекоа насобраните членови на СОНК, кои побараа оставка од Неделков.
Тие посочија дека се дојдени спонтано и дека се чувствуваат изиграни од претседателот на Синдикатот. Велат дека не им се важни процентите за зголемување на платите, туку колективните договори.
„Голем дел од членството ќе продолжи да ги бара своите права. Нас не ни се битни тие 18 отсто. Прва работа поради која тргнавме во штрајк е колективниот договор“ рекоа тие.
Прашани дали ќе има утре настава, велат дека оние деца што ќе дојдат во училиште, нема да бидат вратени.
„Сите оние кои утре ќе дојдат во училиште, ќе бидат прифатени. Ние ќе бидеме во училиште, ако дојдат деца, ќе ги примиме. Ако треба ќе држиме и настава“ – порачаа дел од наставниците.
Синдикатот на СОНК денеска го стави штрајкот во мирување по добиеното известување од Министерството за труд и социјална политика дека Министерството за образование и наука е подготвено преку мирно решавање на спорот да ги надмине разликите.