Музички миксови и програма „PMG si Ti“ за роденденот на Мирко Попов

Со специјални музички миксови достапни за сите и со повеќе настани ќе биде одбележан 15 октомври, роденденот на еден од најпознатите македонски автори и продуценти на електронска музика Мирко Попов (1972-2024). Тој беше и издавач на македонска музика, диџеј, радио водител и уредник, иницијатор и организатор на бројни музички фестивали, програми и културни акции.

Во негова чест, онлајн продавницата Mitra.mk, чиј голем поддржувач беше и Попов ќе го одбележи неговиот роденден со специјални музички миксови достапни за сите, кои ги направија неговите најблиски другари, соработници и диџеи. Миксовите ги рефлектираат креативизмот и страста кон музиката, кои беа нераскинлив дел од Попов.

Музички миксови направија: Дарко Јорданов, Виолета Качакова, Александар Гавровски, Божидар Видоевски, Илина Ангеловска, Нино Наумов, Божидар Јовановиќ Боле, Далибор Таневски – Дади, Дарко Марковски, Александар Малевски, Зоран Ристевски Зоки – Бејбе, Оги Узун, Нино Флудер, Роботек и Теа Шалдева.

Одбележувањето на неговиот роденден ќе продолжи на 18 октомври во барот „МАККА“ и ноќниот клуб „Епицентар“ со целовечерна музичка програма, која ќе се случи под името „PMG si Ti“, како цитат од песната „Право“ на ПМГ Колектив и обединувачки глас на прогресивната и еманципирана мисла и културно движење. Вечерта ќе има музика и диџеј настапи на: Александар Гавровски, Дарко Јорданов, Нино Наумов, Виолета Качакова, Андреја Салпе, Илина Ангеловска и Божидар Видоески.

Дискографската куќа „ПМГ Рекордингс“ потсетува дека  уште од раните 90-ти преку создавање на ПМГ (прогресивна мултимедијална група) како водечка авангардна сила на скопските улици, Попов иницира широк спектар акции во полето на музиката и урбаната култура. Крајот на 90-те го бележи со формирањето на дискографската куќа ПМГ Рекордингс со над 300 изданија на современа македонска музика. Отворена за различни жанрови на автентичен и квалитетен израз од домашни автори, издаваштвото се развива и преку под-лејбловите ПМГЏез, ПМГ Танц Дигитал, Con:Tempo и Мкаедониде.

Попов иницираше и организираше бројни музички програми, фестивали и редовни концерти на музичарите чија музика ја издаваше. Освен промоција на домашната музика во рамки на овие настани во домашен контекст, презентираше и дел од светската електронска, рок и џез сцена. Меѓу нив се: Првиот фестивал на електронска музика кај нас „TRIBAL GATHERING“ (1996), „СЛОБОДНО СКОПЈЕ ФЕСТИВАЛ“ (1999) – еден од најзначајните кросовер настани кај нас, 14 изданија на ПМГ Рекордингс Фестивал, како и фестивалите произлезени од соработката со останати дејци на сцената: 12 изданија на Земјотрес – фестивалот на свежа домашна музика и пет изданија на Крај Вардарот Џез фестивал. Неговата пасија за винили го води во нов предизвик да издава македонска музика на овој се уште најценет носач на звук. Од 2017 до 2024 за ПМГ Рекордингс издава 13 винилни на  македонска музика.

Тој како музички автор и изведувач активно твори и настапува во своите бендови: ПМГ Колектив, Кантон 6 и Македони кру, како и со својот соло проект Мирко Попов квартет. Вкупно 17 албуми, едно издание на најголемите хитови на ПМГ Колектив, бројни синглови, како и еден албум соработка со Сетстат и Никола Коџобашија.

Како писател е потпишан на изданијата „Монографија: 20 Години те сакам“ и книгата за деца „Розевата планета“. Автор е на музика за театар и филм. Режисер и продуцент на музички видео записи, меѓу кои и музички филм „До небото замок“. Две децении работи како водител на бројни емисии на Канал 103, и дел од уредничката структура. Значењето на ова радио го документира во филмот „103 Љубовно писмо до алтернативната култура” (2012), во кој се јавува како сценарист, продуцент, наратор и селектори на музика.

– Неговиот придонес во македонската култура ќе остане трајно запишан и вреден, а неговата работа и креиран простор продолжува да се цени и развива преку делувањето на најблиските соработници, соопшти дискографската куќа „ПМГ Рекордингс“.

Фото: „ПМГ Рекордингс“