Под претседателство на Алексис Ципрас, Комитетот на Парламентарното собрание на Советот на Европа за Западен Балкан денеска и утре ќе одржи состаноци во Белград, a домаќин ќе биде Собранието на Србија, јави дописничката на МИА од Атина.
Работата на Комитетот заедно со Ципрас ќе ја отворат српскиот премиер Милош Вучевиќ и претседателката на Собранието на Србија Ана Брнабиќ, а ќе учествуваат пратеници од земјите-членки, особено од Западен Балкан.
Според информациите од Грција, се очекува Ципрас, како претседател на Комитетот да ја истакне важноста што ја има почитувањето на меѓународните договори за обезбедување мир и стабилност, за справување со национализмот и за европската перспектива на Западен Балкан.
Дополнително, ќе ја нагласи важноста на заедничкиот развој на регионот во економијата, енергетиката и новата зелена и дигитална агенда, како и координација во прашањата за безбедноста и дипломатијата за градењето доверба и справувањето со национализмот.
На маргините на состанокот, Ципрас ќе се сретне со српскиот премиер.