Поставени скулптури со прашањето „Ќе се дише ли зимава?“ на плоштадот Македонија и пред ЈУ Домот на културата Кочо Рацин. Скулптурите се поставени во рамки на герила акција на Младинскиот образовен форум (МОФ).
Организацијата има за цел да ја подигне свеста на институциите во однос на сите прашања поврзани со животната средина. Исто така да побуди критичко размислување за одговорностите на одредени носители на одлуки и преземањето конкретни мерки и чекори за совладување на овие клучни проблеми.
Според стратешката програма на владата за намалување на аерозагадувањето, односно планот за чист воздух од периодот 2019-2020, за прв пат се издвојуваат посебни буџетски средства исклучиво за намалување на аерозагадувањето. За оваа намена беа обезбедени дополнителни 1.5 милиони евра.
Оваа програма имаше план да го намали аерозагадувањето во Скопје до 50 отсто.Во другите градови коишто се засегнати повеќе од некои други, намалувањето е помеѓу 30 отсто и 50 отсто. Начинот на финансирање на активностите беше со почетен посебен фонд од 1.5 милиони евра и овие средства се дополнителни, покрај оние што постојат за различни активности на различни министерства поврзани со заштита на животната средина во висина од 20 милиони евра, наведуваат од МОФ.
Идејата за герила акцијата била поттикната од младите активисти од средношколските клубови на МОФ.
Иницијативата е дел од проектот „Креативна младинска акција за животна средина“, поддржан од Фондација Отворено Општество – Македонија. Содржината е единствена одговорност на авторот и не нужно ги изразува ставовите на Фондација Отворено општество – Македонија.