„Прифаќањето вина во `Титаник` го сметам за висок морален чин, но во овој предмет сигурен сум во мојата невиност“. Ова денеска го изјави во завршен збор за предметот „Топлик” поранешниот министер за транспорт и врски – Миле Јанакиески. Тој смета дека обвинителниот акт за овој предмет е апсурден.
„Апсурд е тврдењето дека во 2007 година сме се организирале да напраивме дело знаејќи дека ќе настанат штети во 2013 година. Замислете, уште во 2007 сме знаеле дека правобранителството ќе постигне спогодба и ќе бидат исплатени средства во име на законска затезна камата што обвинителството го смета за штета. Да ја имав таа моќ, уште во 2007 година да предвидам се што ми се случува сега, ќе си поднесев оставка уште тогаш и никогаш немаше да се занимавам со политика“ – рече Јанакиески.
Тој нагласува дека не постои ниту писмен, ниту вербален доказ дека до него бил доставен некаков записникот и дека тој дал потврда или согласност за објава.
„Апсурдно е тврдењето дека сум искористил службена положба, кога согласно закон само министер може да формира комисија, така било и пред мене и после мене“ – изјави Јанакиески.
Денеска завршен збор даде и обвинителот Бурим Рустеми, кој рече дека од изнесените докази во текот на постапката во целост се потврдило дека дејствијата на екс-министерот за транспорт и врски и членовите на Комисијата за јавно наддавање му нанеле штета на Буџетот на државата во висина од 1 милион евра, како исплатена камата на израелската фирма „Сан сити” поради неспроврдливоста на договорот од спроведеното јавно наддавање за продажба на земјиштето за комплексот „Сончев град”.
Обвинителот Рустеми, побара од Судот да ги прогласи за виновни.