Претседателот на ВМРО-ДПМНЕ по средбата со лидерот на ДУИ – Али Ахмети изјави дека разговарале за две теми генерално. Средбата траеше еден час. Првата тема бил спорот со нашиот источен сосед.
„Јас ги повторив нашите тези принципиелниот став да се почитува Резолуцијата усвоена од Парламентот, од сите политички партии и изразив загриженост поради фактот што колку повеќе ги напуштаме нашите преговарачки позиции, толку повеќе барањата од нашиот источен сосед се поголеми и на тој начин само се уништува преговарачката позиција и ништо не се добива за возврат. Јас лично и ВМРО-ДПМНЕ цениме дека треба да се напушти принципот на коленичење и сервилност, треба да се покаже карактер и да се вложиме максимално сите за да го покажеме тој карактер тоа е она коешто е моја порака, како и тоа дека доста е од срамови и понижување, народот е фрустриран затоа што многу отстапки направи во оваа наша независност, а во суштина уште сме во предворјето и не можеме да го почнеме тој процес на преговори. Тоа е нашата принципиелна позиција и таа позиција подготвен сум да ја бранам и со факти и со аргументи било каде и пред било кој“ рече Мицкоски.
Тој напомена дека втората тема на која разговарале со Ахмети биле предвремени парламентарни избори.
„Имајќи во предвид дека како ВМРО-ДПМНЕ можеби бевме и предмет на критика од страна на јавноста, бидејќи бевме некако молчаливи изминатиов период и не бевме присутни во јавноста само со една цел, да не си најде некој изговор дека ете ВМРО-ДПМНЕ е виновно зошто ние не ја добиваме датата за почеток на преговорите. Но, сега веќе кога и повеќе од јасно дека поминува и декември месец, се бараат некои нови шест месеци за преговори, едноставно последниот адут којшто го имаше оваа Влада заминува во неповрат. Имајќи ја во предвид состојбата во општеството, криминалот и корупцијата нефункционалните институции, недисциплината, лошата економска и енергетска состојба во земјава и уште многу други фактори коишто негативно влијаат, мојот став е дека само со сериозен ресет на системот, многу макотрпна работа и нови луѓе можеме да излеземе од оваа кризна состојба од којашто се наоѓаме, а за тоа се потребни предвремени парламентарни избори. Така што јас го кажувам мојот став не ставот на господинот Али Ахмети, дека предвремени парлaментарни избори се потребни час поскоро од овие причини и овие аргументи кои ги имаме“ посочи првиот човек на ВМРО-ДПМНЕ.