Генералната директорка на Радио и телевизија на Србија (РТС) Мања Грчиќ поднесе оставка од таа позиција. Во образложението за својата одлука, таа наведе дека ја донела по внимателно разгледување на околностите во кои моментално функционира јавниот сервис, оценувајќи дека е во интерес на институцијата да овозможи непречено продолжување на нејзината работа.
„Очекувам Управниот одбор, во рамките на своите законски овластувања, без одлагање да ги преземе сите потребни мерки за да обезбеди континуитет на раководството и законско предавање на должностите“, напиша таа.
Грчиќ додаде дека е подготвена да ја обезбеди сета потребна соработка во согласност со законот за да се изврши предавањето на должноста правилно и без последици за работата на Радио и телевизија на Србија.
Заминувањето на шефицата на РТС дојде откако дел од вработените во јавниот сервис и кандидатите на Студентската листа побараа нејзина оставка. Заедно со нејзиното заминување, беа побарани и оставки од другите членови на раководството и уредникот на Информативната програма.
Грчиќ во изминатите неколку дена одржа состанок со претставници на репрезентативните синдикати на вработените во РТС. Според претходните медиумски извештаи, таа тогаш изјавила дека нема намера да поднесе оставка.
Мања Грчиќ беше назначена за генерален директор на Радио Телевизија на Србија на 11 февруари 2026 година со одлука на Одборот на директори со петгодишен мандат. Таа ја презеде функцијата на 25 февруари 2026 година, станувајќи првата жена на чело на јавниот сервис, објавува „Еуроњуз“.
Пред да го преземе кормилото на РТС, таа работеше во Би-Би-Си, Б92, Пинк и ТВ3 Словенија. Таа беше и директорка на компанијата „Медија систем“, генерален директор на агенцијата Танјуг и управуваше со работењето на групацијата „Антена“ во Србија и Црна Гора, во која беа вклучени Прва телевизија и О2 ТВ.
Дипломирала новинарство на Универзитетот во Лидс во Велика Британија, а во својата биографија прикачена на конкурсот навела повеќе од 20 години искуство во медиумската индустрија.