Ибрахим Калин – главниот советник за надворешна политика на турскиот претседател и Џејк Саливен – американскиот советник за национална безбедност вчера разговараа за кандидатурите за НАТО и за војната во Украина.
Калин истакнал оти Турција сака „конкретни мерки“, кога станува збор за постоењето на „терористичките организации“ во Финска и во Шведска, пред да се разгледаат нивните кандидатури за влез во Алијансата. Тој додал и дека земјите што сакаат да се приклучат на НАТО, мораат да „ги усогласат вредностите и принципите на Алијансата за безбедноста и борбата против тероризмот“ всушност „Шведска и Финска да преземат конкретни мерки за терористичките организации што ја загрозуваат националната сигурност на Турција“.
Од Белата куќа соопштија дека Саливан „изразил поддршка за продолжување на директни разговори на Турција со Шведска и со Финска, со цел да се реши загриженоста околу нивните барања за членство во НАТО, што САД цврсто поддржува“.
Турција се спротивстави на членството на Финска и Шведска во НАТО со образложение дека пружаат засолниште на припадници на Курдска работничка партија (ПКК) и други групи, кои Анкара ги оценува како терористички.