Велика Британија ќе ја вклучи руската платеничка група „Вагнер“ на листата на терористички организации, објавија денеска британските медиуми, повикувајќи се на министерката за внатрешни работи Суела Браверман.
Нацрт-наредбата ќе овозможи имотот на „Вагнер“ да биде категоризиран како терористички имот и да биде запленет, според Би-Би-Си, додавајќи дека ќе биде незаконски да се биде член или да се поддржува организација под наредбата.
Браверман изјави за Би-Би-Си дека Вагнер е „насилен и деструктивен“ и дека тој е „воена алатка на Русија на (претседателот) Владимир Путин.
„Тие се терористи, обични и едноставни, а оваа наредба за забрана го покажува тоа јасно во законот на ОК“, рече таа.
Прогласувањето на „Вагнер“ за терористичка организација би значело дека во Британија би било кривично дело да се припадне на групата или да се промовира, да се организираат или да се обраќаат на нејзините собири и да се носи нејзиното лого во јавноста, според Ројтерс.
Британската агенција потсетува на ангажманот на „Вагнер“ во Украина, чии војници беа распоредени во таа земја веднаш по почетокот на руската инвазија во февруари минатата година.
Дејли телеграф наведува дека со оваа одлука на владата во Лондон платениците на Путин ќе се изедначат со Исламската држава и Ал Каеда кои веќе се на британската листа на терористички организации.