Ангеловска-Бежоска: Инфлацијата почна да се намалува, очекувам таа да биде едноцифрена

Инфлацијата не доведе до класичен ценовен шок, но таа резултираше со покачување на каматните стапки, рече гувернерката на Народната банка, Анита Ангеловска-Бежоска. Таа посочи дека минатиов период на светско ниво се случил најсинхронизиран циклус на затегнување на монетарните политики.

-Ние одговоривме преку стабилен девизен курс на домашната валута, рече Ангеловска-Бежоска.

Таа додаде дека клучни аспекти биле курсот, односно девизниот пазар и инфлациските притисоци.

-Уште кон крајот на 2021 година забележавме притисоци и оттогаш реагиравме со монетарната политика одржувајќи ја ликвидноста, истакна гувернерката.

Таа додаде дека како резултат на преземените мерки, особено во сегментот на енергијата и храната, инфлацијата за првпат се намалила во ноември минатата година и очекува овој тренд да продолжи.

Ангеловска-Бежоска очекува инфлацијата да се симна на едноцифрен број.