Општина Центар поставува 20 контејнери за селекција на текстилен отпад

Општина Центар почна со поставување 20 специјализирани контејнери за селекција на текстилен отпад на локации пред основните училишта и детските градинки, во соработка со лиценцираната компанија „Еко-текс груп“.

Како што стои во соопштението на Општина Центар, во првата фаза ќе бидат поставени 11 контејнери, а во втората уште девет, со што ќе бидат опфатени вкупно 20 локации во општината. Градоначалникот на Општина Центар, Горан Герасимовски, посочи дека целта на иницијативата е подигнување на еколошката свест и поттикнување на одговорно однесување кон животната средина.

– Првиот контејнер за текстилен отпад го поставивме пред ООУ „Коле Неделковски“. Преку ваквите иницијативи ги учиме децата, но и возрасните, да се однесуваат општествено и еколошки одговорно. Со едукација за собирање, рециклирање и повторна употреба заедно придонесуваме за почиста и поздрава средина – рече Герасимовски.

Граѓаните во контејнерите ќе можат одделно да оставаат стара облека, обувки и други текстилни производи, кои наместо да завршат во комуналниот отпад, ќе бидат селектирани, сортирани и упатени на натамошен третман и рециклирање.

Од Општина Центар посочуваат дека активностите се спроведуваат во согласност со принципите за заштита на животната средина, важечките законски прописи и меѓународните стандарди.