Спасен 91 мигрант од мал остров во реката Еврос на границата Турција – Грција

Од мал остров во реката Еврос на грчко –турската граница вчера била спасена група од 91 мигрант, а меѓу нив и над 30 деца.

Според грчката полиција мигрантите на грчка територија пристигнале со помош на криумчар, кој со чамец ги превезол од спротивниот брег и ги оставил на островот, а станува збор за 32 мажи, 25 жени и 34 деца.

Мигрантите се во добра здравствена состојба, а грчките власти им обезбедиле облека, храна и прва помош.

Од кабинетот на грчкиот премиер Јоанис Сармас соопштија дека надлежните власти, „со почитување на националното, ЕУ и меѓународното право, ги преземаат неопходните активности за да се спречи секое нелегално влегување на странски државјани во земјата“.

-Во последните денови нискиот водостој на реката Еврос го фаворизира илегалниот премин на мигрантите, кои ги користат малите острови што паѓаат и на грчка и на турска територија, соопштија од кабинетот на грчкиот премиер.

Додадоа дека грчката Влада апелирала до новата турската Влада „да ги координира граничните власти и да спречи илегални преминувања“.

Ова е втор случај за краток временски период, група мигранти да се обидат преку реката Еврос од Турција да влезат во Грција, со оглед на тоа што во четвртокот беа спасени 134 мигранти.