Министрите за одбрана на Русија и САД, Сергеј Шојгу и Лојд Остин, синоќа телефонски разговарале, ден откако руски авиони пресретнаа американско беспилотно летало над Црното Море, соопштија од Москва и од Вашингтон.
Руското Министерство за одбрана соопшти дека синоќа рускиот министер за одбрана генерал Сергеј Шојгу и американскиот министер за одбрана Лојд Остин разговарале телефонски на иницијатива на американската страна, без да наведат дополнителни детали.
Американскиот државен секретар Лојд Остин на прес-конференција во Пентагон изјави дека синоќа разговарал со својот руски колега за уништувањето на американско беспилотно летало над Црното Море.
Тоа беше прв телефонски разговор меѓу двајцата министри од октомври.
„Само што разговарав со мојот руски колега, министерот Шојгу. Како што реков многу пати, важно е големите сили да бидат модели на транспарентност и комуникација, а САД ќе продолжат да летаат и да спроведуваат операции каде и да дозволува меѓународното право“, изјави Остин.
Русите и Американците различно го толкуваат завчерашниот инцидент со дронот. Руската војска соошти дека два воени авиони пресретнале американско беспилотно летало над Црното Море, но дека ниту го погодиле, ниту го собориле, спротивно на она што го кажа Вашингтон. Американската војска соопшти дека руски борбен авион Су-27 соборил американско беспилотно летало Reaper над Црното Море, област која НАТО внимателно ја следи од почетокот на војната во Украина.