Поплави ја погодија Турција, четири лица загинаа

Четири лица загинаа, а три се водат како исчезнати во поплавите што ја погодија Турција.

Во меѓувреме, турската Генерална дирекција за метеорологија издаде жолто и портокалово предупредување за 45 провинции поради најавените обилни врнежи и силен ветер, објави „Хуриет“.

Портокалово предупредување е издадено за Истанбул, Бурса, Коџаели, Јалова и Сакарија, додека жолто предупредување важи за уште 40 провинции.

Во Истанбул се очекуваат локално многу обилни врнежи, особено од пладневните часови.

Најзагрозени би можеле да бидат северните и анадолските делови на градот.

Интензивни врнежи се прогнозираат и во Бурса, Билечик, Коџаели, Сакарија, Зонгулдак, Бартин и во крајбрежните подрачја на Дуџе.

Силни врнежи проследени со грмежи се очекуваат и во делови од Егејскиот, Средоземниот, Централниот и Источниот Анадолски регион, како и во западниот и централниот дел на Црноморскиот регион.

Метеоролозите предупредуваат и на силен ветер и бурни налети со брзина од 50 до 70 километри на час, кои повремено би можеле да достигнат и до 80 километри на час.

Во одделни подрачја ветерот ќе дува од запад и северозапад, додека во други региони ќе преовладува јужен ветер.

Поради опасноста од ненадејни поплави, свлечишта, удари од гром, град, оштетување на покриви и нарушувања во сообраќајот, граѓаните се повикани да бидат внимателни и да ги почитуваат предупредувањата на надлежните служби.