Унгарија ја тужи ЕУ поради декретот за откажување на увозот на руски гас

Унгарската влада денеска поднесе тужба до Судот на правдата на Европската Унија, барајќи поништување на регулативата RePower на ЕУ, која има за цел постепено да го укине увозот на руски гас, изјави шефот на унгарската дипломатија, Петер Сијарто.

Сијарто тврди дека ЕУ ги пречекорила своите овластувања со усвојувањето на регулативата, бидејќи одлуката погрешно била претставена како мерка на трговска политика, а не како санкција, додека нејзиното спроведување би ја загрозило безбедноста на снабдувањето со енергија во Унгарија.

Сијарто, пишува Hungarian Index, изјавил дека Унгарија ја оспорила регулативата RePower на ЕУ пред Судот на ЕУ по нејзиното официјално стапување во сила, посочувајќи дека за Унгарија нема поевтини и посигурни алтернативи на руската нафта и гас, и дека без овие извори на енергија не е можно да се гарантира енергетската безбедност на земјата или да се одржат ниски трошоци за домаќинствата.

Тој наведе три клучни причини зошто Будимпешта бара поништување на регулативата, имено дека RePower EU во суштина претставува политика на санкции, што би барало едногласна одлука од земјите-членки, потоа дека ЕУ нема овластување да донесува такви одлуки бидејќи енергетската политика е одговорност на земјите-членки, како и дека принципот на енергетска солидарност во ЕУ е прекршен ако е загрозено снабдувањето со енергија на која било членка.

Според Сијарто, судската постапка би можела да трае помеѓу една и пол и две години, а откажувањето на руските извори на енергија, како што наведе, би можело да ги зголеми трошоците за енергија во Унгарија за трипати.

Регулативата RePower EU беше усвоена од Европскиот парламент во декември, додека Советот на ЕУ ја потврди во јануари, при што само Унгарија и Словачка гласаа против неа.

Според планот, забраната се однесува исклучиво на рускиот гас, додека укинувањето на увозот на руска нафта и нуклеарно гориво ќе се одлучи со посебна регулатива во 2026 година.

Според договорот на институциите на ЕУ, увозот на руски течен природен гас (LNG) би бил забранет од почетокот на 2026 година, додека забраната за увоз на гас преку цевководи би стапила во сила на 30 септември 2027 година, со преодни периоди за постојните договори.

Регулативата предвидува обврска на земјите-членки да подготват национални планови за диверзификација на снабдувањето со гас, додека Европската комисија ќе го надгледува спроведувањето на забраната.

Комисијата има можност привремено да ја суспендира забраната во случај да е загрозена безбедноста на снабдувањето на една или повеќе земји-членки, но само за ограничен период и за краткорочни договори.