ФИФА го осуди однесувањето на фудбалерите на Сенегал

Претседателот на ФИФА, Џани Инфантино го осуди однесувањето на репрезентативците на Сенегал, кои во неделата во финалето на Африканскиот куп на нации против домаќинот Мароко привремено го напуштија теренот во Рабат, незадоволни од судиските одлуки.

Мароко доби пенал во судиското продолжение на второто полувреме по сугестија од ВАР собата, кратко време откако на Сенегал му беше поништен гол. Потоа, сенегалскиот тим го напушти теренот во знак на протест пред Брахим Дијаз да може да го изведе пеналот. Во исто време имаше и судири меѓу сенегалските навивачи и полицијата на трибините.

Играчите се вратија 16 минути подоцна, по што Мароко не го реализираше пеналот, а Сенегал во првото продолжение постигна гол и ја освои титулата.

„За жал, видовме неприфатливи сцени на теренот и на трибините – го осудуваме однесувањето на некои навивачи, како и на некои од играчите и персоналот на Сенегал. Неприфатливо е да се напушти теренот на овој начин, а насилството не може да се толерира во нашиот спорт, едноставно не е во ред. Секогаш мора да ги почитуваме одлуките на судиите на теренот и надвор од него“, напиша Инфантино на својот Инстаграм профил.

Инфантино ги опиша настаните од финалето како „неприфатливи“ и изрази очекување да бидат воведени санкции против инволвираните.

„Очекувам одговорните дисциплински тела во Африканската фудбалска конфедерација да преземат соодветни мерки“, додаде претседателот на ФИФА.