Ахмети бара од Курти да им се извини на Албанците затоа што „застанал на страната“ на Мицкоски

Лидерот на Демократската унија за интеграција, Али Ахмети, во интервју за „Еуроњуз Албанија“ изјавил дека позициите на Албанците во Македонија се деградираат поради нивната несоодветна застапеност во владата.

Тој го обвини косовскиот премиер Албин Курти дека застанува на страната на премиерот Христијан Мицкоски, на, како што вели, штета на Албанците од Македонија и нивните права. Бара од Курти да им се „извини на албанската заедница“.

„Зошто Албин Курти застанува на страната на Мицкоски? Соработував со сите партии во Албанија и Косово и никогаш не сум застанал на нечија страна. Ни требаат добри односи со двете албански држави. Тој отворено застана на страната во поддршка на антиалбанската политика на Мицкоски. Две месеци медиумите во Македонија се занимаваат со Коридорот 8 и дека се гради во Голема Албанија“, рекол Ахмети во емисијата.