Јотова не била информирана за доаѓањето на Ива Михаилова во Бугарија, изрази подготвеност да се сретне со неа

Бугарската претседателка Илијана Јотова изјави дека ќе ги почека резултатите од лекарските прегледи во болницата „Пирогов“ во Софија за да добие појасна слика за здравствената состојба на 23-годишната Ива Михаилова, која се наоѓа во Бугарија и покрај судските мерки што ѝ се изречени во Северна Македонија.

Михаилова е обвинета во судска постапка што се води во Кочани, поврзана со сообраќајна несреќа со смртни последици. Во рамките на постапката ѝ биле одземени патните исправи и ѝ биле определени мерки за ограничување на движењето, поради што нејзиното заминување во Бугарија отвори прашања за начинот на кој ја преминала државната граница.

Јотова, одговарајќи на новинарски прашања по учеството на меѓународна конференција посветена на безбедноста во Црното Море, одржана во Софија, посочи дека дури утрово дознала дека Михаилова се наоѓа на бугарска територија.

Како што објасни, во моментот нема доволно информации за околностите под кои 23-годишната девојка ја напуштила Северна Македонија, ниту за деталите поврзани со нејзиното пристигнување во Бугарија.

„Разбрав дека таа веќе е во Бугарија откако излегов од телевизиско студио на БТВ. Претпоставувам дека сега ќе биде прегледана во Пирогов, бидејќи за време на конференцијата дознав дека претстои таков преглед. Ќе почекаме да видиме каков е заклучокот на бугарските специјалисти. За жал, во овој момент не можам да дадам повеќе информации“, изјави Јотова.

На прашањето дали располага со сознанија како Михаилова успеала да ја напушти Северна Македонија, имајќи ги предвид судските ограничувања, како и каква реакција очекува од македонските власти, бугарската претседателка одговори дека случајот сè уште содржи голем број неразјаснети околности.

„Ќе видиме. Сè уште има многу нејасни околности. Мислам дека надлежните органи во Бугарија прво треба да дадат изјава“, рече Јотова.

Таа не даде конкретен одговор за начинот на кој Михаилова ја преминала границата, посочувајќи дека е потребно надлежните институции да ги разјаснат фактите.

Воедно, Јотова изрази подготвеност лично да се сретне со Михаилова во најкус можен рок, доколку нејзината здравствена состојба го дозволува тоа.

Бугарската претседателка беше прашана и дали враќањето на Михаилова во Бугарија би можело да претставува безбедносен ризик. Таа одговори дека не гледа опасност од таков развој на настаните, нагласувајќи дека во овој момент приоритет треба да биде утврдувањето на здравствената состојба на девојката.

„Нема начин безбедноста да биде загрозена. Прашањето сега е да се види каква е нејзината состојба и да се преземат итни мерки на кои инсистираме толку месеци – не само тука во Бугарија, туку и пред сите меѓународни институции“, изјави Јотова.

Случајот предизвика дополнително внимание поради фактот што против Михаилова се води судска постапка во Македонија, додека нејзиното присуство во Бугарија отвора прашања за почитувањето на определените судски мерки и постапувањето на надлежните институции од двете држави.

Засега останува неразјаснето под кои околности Михаилова ја напуштила македонската територија. Се очекува надлежните органи да дадат дополнителни информации, додека бугарската страна ги очекува и лекарските наоди од болницата „Пирогов“.