Петмина загинати во Краков откако напаѓач пукал од автомобил во движење, полицијата го застрела
Според извештајот на полицијата на Малополското војводство, напаѓачот го возел својот автомобил на преполниот главен плоштад во градот околу 15 часот по локално време и почнал да пука кон минувачите од возило во движење.
Крвав вооружен напад го потресе историскиот центар на полскиот град Краков, каде што вооружен маж отворил оган врз минувачите од автомобил во движење.
Според најновите информации што ги објави полицијата, во нападот загинале пет лица, а повеќе од десет се повредени. Полицијата пукала кон осомничениот напаѓач и го ранила, по што тој бил пренесен во болница.
Пукањето се случило во саботата, околу 15 часот, на главниот градски плоштад во Краков. Истрели одекнале во близина на црквата „Света Марија“, додека полицијата истовремено спроведувала операција на улицата „Дитл“, информирале градските власти.
Според сведочењата пренесени од полските медиуми, црн автомобил поминал низ плоштадот, а лицето во возилото почнало да пука кон случајни минувачи.
На местото веднаш пристигнале полициски и медицински екипи, а за итен транспорт на повредените бил ангажиран и медицински хеликоптер. Во инцидентот, според медиумските извештаи, биле повредени и полициски службеници.
Според најновите информации, полицијата го пресретнала напаѓачот и отворила оган кон него. Тој бил застрелан и ранет, а потоа пренесен во болница. Засега нема потврда дека починал.
За нападот се огласи и полскиот премиер Доналд Туск, кој соопшти дека редовно добива информации од министерот за внатрешни работи.
„Полицијата ги истражува заднината и сите околности поврзани со нападот“, порача Туск.
Истрагата продолжува, а надлежните институции работат на утврдување на мотивот и сите детали за вооружениот напад.