Најмалку 27 лица се спасени во претходните 24 часа во романските планински области, девет од нив морале да бидат хоспитализирани, а некои се сместени на одделението за интензивна нега, соопшти денеска спасувачката служба Салвамонт Романија.
Во претходните 24 часа Салвамонт примил 28 повици со барање итна интервенција на спасувачите, објавено е на веб-страницата на организацијата.
Службите во Воинеаса и Муреш примиле најмногу повици, објави Аџерпрес.
Исто така, поради снежната бура затворени се и државните патишта во источна Молдавија во Романија, соопшти регионалната дирекција за патишта. Како што е наведено, патиштата се затворени во областите Јаши, Ботошани, Васлуј, Њамц, Бакау, Галати и Браила.
Снежната бура предизвика и прекин на железничкиот сообраќај на станицата во општина Марашешти, во областа Вранча.
Поради снежната бура се случија неколку сообраќајни незгоди во кои неколку лица се повредени.