По вчерашниот масакр во центарот на Краков, Полска, во кој загинаа шест лица, а уште тројца беа пронајдени мртви во домот на напаѓачот, пристигнуваат нови информации за повредени.
Меѓу жртвите има и кочијаши кои секојдневно превезуваат туристи на главниот градски плоштад. Двајца од нив се борат за живот, а уште неколку се тешко повредени, соопшти нивното здружение, пренесува полски Онет.
Во престрелката се повредени 15 лица, меѓу кои и двајца полицајци. Регионалниот гувернер Кшиштоф Јан Клечар изјави дека 12 лица се тешко повредени. Меѓу жртвите има и странски државјани.
Дорота Литвичка, претседател на асоцијацијата на кочијаши во Краков, објави дека нападот силно ги погодил нивните членови.
„Многу наши колеги загинаа. Двајца се борат за живот, а неколку од нив се здобија со тешки телесни повреди“, рече Литвичка во објавата на социјалните мрежи.
„Ова е најголемата трагедија за нашето пајтонско семејство во целиот период на нашата работа на главниот плоштад“, рече таа.
Во нападот се ранети и два коња кои влечат туристички коли. Според информациите од организацијата за заштита на животните ОТОЗ Анималс, едниот коњ куршумот го „огребал“, додека другиот е ранет во ногата. И двата преживеале и добиле ветеринарна терапија. Не е познато дали напаѓачот намерно ги нападнал животните.
Здружението изрази сочувство до семејствата на загинатите и поддршка на повредените. Градските власти донесоа одлука до понатамошно известување да ги затворат постојките на туристичките вагони на главниот плоштад во Краков, како и сите алтернативни постојки.
Полскиот министер за внатрешни работи Марчин Кирвињски даде нови детали за полициската интервенција.
Според него, полицајците отвориле оган кон напаѓачот само три минути по првата пријава.
„Брзата реакција на полицијата спречи многу поголем масакр. Првите истрели беа испукани кон напаѓачот три минути по пријавата. По три минути пристигнаа и пожарникари и брза помош“, изјави Киервињски.
Полицијата на Малополското војводство објави уште попрецизни информации, според кои првата патрола почнала да интервенира само 23 секунди по приемот на пријавата.
Двајца полицајци се ранети додека го запирале напаѓачот. Еден од нив Јакуб Кулик се здобил со три прострелни рани и е во многу тешка состојба. Доброволните пожарникари од Волчин упатија јавен апел за дарување крв за да му помогнат.
Полските медиуми објавија и дополнителни детали за крајот на нападот. При обидот да побегне, напаѓачот се судрил со друг автомобил на раскрсницата. Потоа излегол од возилото и отворил оган кон полицајците, кои возвратиле и го раниле.
Осомничениот бил совладан и пренесен во болница во Краков, каде му била извршена операција поради повреди опасни по живот.
Според полициските информации тој користел полуавтоматска пушка слична на АР-15. Со себе имал и пиштол, а во автомобилот било пронајдено дополнително оружје и муниција.
Полското Министерство за одбрана ги отфрли шпекулациите дека напаѓачот бил активен или поранешен припадник на армијата.
Полски Факт пренесува дека обвинителот Томаш Вашчук, портпарол на Окружното обвинителство во Краков, потврдил дека тројцата пронајдени мртви во домот на напаѓачот се неговите родители и сестра.
Нивните тела беа пронајдени во Островец Швиетокрзиски, каде што живеел 24-годишниот напаѓач Михал О.
Поради страв дека во зградата можеби се поставени експлозивни направи, полициските службеници најпрвин со дрон извршиле увид во објектот. Така ги откриле телата на две жени и еден маж.