Еди Рама се соочува со сериозна политичка криза – деветти ден по ред продолжуваат протестите против контроверзниот туристички проект вреден 1,4 милијарди евра

Албанскиот премиер Еди Рама се соочува со сериозна политичка криза, откако деветти ден по ред продолжуваат протестите против контроверзниот туристички проект вреден 1,4 милијарди евра, поврзан со инвестициската компанија „Афинити Партнерс“ на Џаред Кушнер, зетот на американскиот претседател Доналд Трамп.

Демонстрациите, познати во јавноста како „Фламинго револуција“, започнаа по оградувањето на дел од крајбрежјето во Звернец кај Валона, каде што заедно со островот Сазан е предвидена изградба на луксузен туристички комплекс. Граѓаните обвинуваат дека вредно земјиште им се отстапува на странски инвеститори без доволна транспарентност, јавни консултации и соодветни еколошки анализи.

Случајот предизвика реакција и од Европската комисија, која предупреди дека измените на законите за заштитените подрачја би можеле да го загрозат европскиот пат на Албанија. Во меѓувреме, албанското Специјално обвинителство отвори истрага за сопственоста на спорното земјиште.

Наместо да ги смири тензиите, Рама во интервју за „Политико“ изјави дека зад ширењето дезинформации и дел од протестите стои Иран, обвинувајќи го Техеран за водење „хибридна војна“ против Албанија.

„Не можете да ѝ простите на Албанија што ги отвори вратите за луѓе кои бегаат од прогон. Албанија никогаш нема да биде заплашена“, изјави Рама, потсетувајќи на претходните кибернапади за кои Тирана го обвини Иран.

Одговорот од Техеран не изостана. Портпаролот на иранското Министерство за надворешни работи, Есмаил Багаеи, ги нарече обвинувањата „целосна бесмислица“ и оцени дека албанските власти се обидуваат да го одвлечат вниманието од барањата на сопствените граѓани.

„Веројатно наскоро ќе кажат дека и фламингата се ирански тајни агенти“, изјави иронично Багаеи.

Дополнителни реакции предизвика и однесувањето на Рама на социјалните мрежи. Тој сподели неколку транспаренти од протестите, а потоа објави и видеогенерирано со вештачка интелигенција, на кое е прикажан како инфлуенсер на местото на протестите.

Додека демонстрантите бараат итно стопирање на проектот и повлекување на спорните законски измени, политичката криза во Албанија продолжува да се продлабочува, отворајќи прашања за транспарентноста, заштитата на животната средина и односот меѓу големите инвестиции и јавниот интерес.