Просечната плата во Хрватска достигна 1.540 евра
На годишно ниво, просечната нето-плата бележи раст. Во споредба со јули минатата година, таа е номинално повисока за 7,2 проценти, а реално за 3,2 проценти.
Просечната месечна нето плата во Хрватска во јули 2026 година изнесувала 1.540 евра, покажуваат најновите податоци на Централниот завод за статистика. Во однос на јуни, нето-платата е номинално пониска за еден процент, додека реалното намалување, пресметано според инфлацијата, изнесува 0,8 проценти.
На годишно ниво, просечната нето-плата бележи раст. Во споредба со јули минатата година, таа е номинално повисока за 7,2 проценти, а реално за 3,2 проценти.
Највисоките просечни нето-примања се исплатени во секторот за воздушен транспорт, каде што просечната плата достигнала 2.398 евра. Од друга страна, најниска просечна нето-плата е регистрирана во производството на облека и изнесува 1.005 евра.
Просечната месечна бруто-плата во јули изнесувала 2.164 евра. Во споредба со претходниот месец, таа е номинално пониска за 0,9 проценти, односно реално за 0,7 проценти.
Во однос на истиот период лани, просечната бруто-плата е повисока за 8,2 проценти номинално и за 4,1 процент реално.
И кај бруто-платите највисоки примања се забележани во воздушниот транспорт, каде што просекот достигнал 3.514 евра, додека најниската бруто-плата од 1.344 евра е исплатена во секторот за производство на облека.