Османи: Четири години велам дека протоколите не се дел од Преговарачката рамка, Муцунски денеска го потврди тоа

Четири години трпам критики оти велам дека протоколите не се дел од преговарачката рамка, а сега тој чекор е поминат, вели ексминистерот за надворешни работи, Бујар Османи, откако актуелниот министер, Тимчо Муцунски денеска го потврди токму тоа – дека според него, и како министер – и како правник, протоколите, односно записниците од разговорите, не се дел од Преговарачката рамка.

„Четири години велам дека протоколите не се дел од Преговарачката рамка. Четири години трпам критики, напади и навреди. Четири години цртам на табли, објаснувам, повторувам. Еден чекор поминат – Протоколот не е дел од рамката. Продолжуваме понатаму…“, напиша Османи на својот Фејсбук-профил и објави дел од денешната прес-конференција на Муцунски, каде го говори тоа.

Министерот Муцунски на денешната прес-конференција во Влада, доби прашања во однос на спорот со Бугарија, при што истакна дека земјава е во постојана комуникација со земјите-членки, европските институции, како и со соседна Бугарија, но не сакаше да дава оценка колку двете земји се блиску или далеку од решение.

Тој посочи дека во целост се согласува со ставот на претседателката Гордана Сиљановска-Давкова оти во содржината на преговарачката рамка, нема ниту експлицитна ниту, пак, имплицитна одредба поврзана со моментот на влегување во сила на уставните измени и кажа дека од правна и номотехничка гледна точка постои суштинска разлика помеѓу тоа што се наведува во заклучоците на Советот на Европската Унија и Преговарачката рамка, во споредба на тоа што е содржина на вториот протокол.

На новинарско прашање околу тоа дали протоколот е дел од Преговарачката рамка, министерот неколкупати одговори негативно.

„Мојот став како министер за надворешни работи е дека протоколите, да повторам, тоа е називот на записниците од разговорите, некој одлучил да се наречат протоколи, зошто тоа е направено, еве во тоа да не навлезам, согласно моето толкување и како министер за надворешни работи и како правник е дека тие не се дел од Преговарачката рамка“, кажа Муцунски.