Во Приштина се одржа „Маршот за слобода“ во поддршка на поранешните лидери на Ослободителната војска на Косово, на кои им се суди во Хаг – Хашим Тачи, Кадри Весели, Јакуп Красниќи и Реџеп Селими. На маршот учествуваше и лидерот на ДУИ, Али Ахмети, кој порача дека, според него, албанскиот народ го кажал својот став за обвинетите.
Маршот беше организиран од платформата „Слободата има име“, а учесниците носеа знамиња на ОВК и бараа правда и враќање на поранешните лидери во Косово.
„Денеска, во Приштина, марширавме за слободата и во поддршка на ослободителите“, напиша Ахмети по маршот.
Тој оцени дека собирот е порака дека слободата не претставува само сеќавање на минатото, туку вредност која, како што рече, се брани и потврдува секој ден.
„Косово денеска зборуваше силно, изразувајќи благодарност кон оние кои се жртвуваа за неговата слобода и достоинство“, напиша Ахмети.
Најдиректната порака Ахмети ја упати за судењето на Тачи, Весели, Красниќи и Селими пред Специјализираните совети на Косово во Хаг.
„Денеска албанскиот народ го даде својот јасен суд: Хашим Тачи, Кадри Весели, Јакуп Красниќи и Реџеп Селими ги прогласува за невини“, порача Ахмети.
Станува збор за политичка порака и став изнесен од Ахмети по маршот, а не за судска одлука за вината на четворицата обвинети.
За време на маршот беа упатени пораки дека ОВК се кренала против угнетувањето и дека нејзината борба, според организаторите и учесниците, не треба да биде предмет на ревизија преку судски постапки.
Ахмети во својата објава порача дека ОВК е дел од историјата на Косово и од заедничката меморија на оние кои верувале и се бореле за слобода.
„Од Приштина денеска ја испративме пораката дека правдата и слободата мора да одат заедно“, напиша Ахмети.
Објавата ја заврши со пораките: „Слава на сите маченици на слободата! Да живее Косово! Да живее ОВК!“.