Најмалку 110 луѓе загинаа во израелските воздушни напади врз Џабалија, на северот од Појасот Газа, соопшти денеска Министерството за здравство на Хамас, со што бројот на загинатите од почетокот на војната се искачи на 19.453, според новите податоци, пренесуваат светските агенции. .
Во Џабалија, каде што се наоѓа голем бегалски камп, беа погодени неколку станбени згради, изјави портпаролот на министерството, додавајќи дека најверојатно има повеќе жртви под урнатините. Ова не беше можно да се потврди од независни извори, пишува агенцијата dpa.
Министерството за здравство на Хамас денеска соопшти дека 19.453 лица се убиени во израелските воени операции во Појасот Газа од почетокот на војната на 7 октомври, пренесува AFP. Владата на Хамас, која го контролира Појасот Газа од 2007 година, исто така регистрирала 52.286 повредени, според соопштението на Министерството.
Според податоците од петокот имало 18.800 загинати. Џабалија, која се смета за упориште на Хамас, е во центарот на интензивните борби меѓу израелските сили и Хамас. Според СЗО, болницата Камал Адван во Џабалија била речиси целосно уништена.
Најмалку осум пациенти, меѓу кои и едно деветгодишно дете, починале поради несоодветна медицинска нега, објави во неделата вечерта на Твитер генералниот директор на СЗО, Тедрос Аданом Гебрејесус, пренесе Ројтерс.
Постојаната мисија на Израел во ОН во Женева го обвини Тедрос дека не спомнал дека Хамас се „закопал“ во болницата. Пред да влезат во болничкиот комплекс, израелските војници биле во контакт со медицинскиот тим со цел да се организира евакуација на поголемиот дел од болницата, велат од мисијата.
И покрај неколкуте предупредувања, десетици цивили одбија неколку повици да ја напуштат болницата. Според израелската армија, приведени се 90 „терористи“. „Израел, исто така, уништи терористичка инфраструктура и пронајде многу оружје и разузнавачки документи, вклучително и оние скриени во инкубатори за предвремено родени бебиња“, објави израелската мисија во ОН.