Новинарката Марија Димишкова вечерва дискутираше со пациентката со ретка Вилсонова болест, Ања Босилкова Антовска која ни објаснува како е да се живее со Вилсонова болест. Инаку, таа е дипломиран економист на УКИМ во Скопје и е магистер по меѓународни односи.
Босилкова Антовска на само 20 години ја открива оваа болест, а при соочувањето најголем проблем ѝ бил стравот од непознатото и неочекуваното.
70 очекувани пациенти има со Вилсонова болест, а само триесетина се дијагностицирани. Во времето кога јас ја добив дијагнозата пред 10-ина години симптомите се појавија одеднаш. Кога станува збор за нарушување на црниот дроп, а Вилсоновата болест е токму тоа, генетска болест која го нарушува метаболизмот на бакарот, а потоа тој се таложи на црниот дроп пред се, меѓутоа и на мозокот. Кога болеста е понапредна и оштетувањето е понапоредно тогаш се појавуваат првите симптоми, тоа можат да бидат отоци, жолтило, но и многу нејасни нарушувања кои се прикажуваат на крвна слика или одредени анализи, вели Босилкова Антовска.
Таа вели дека имала и премор, тешкотии во зборување, вкочанетост на мускули, а најтешко е да се поврзат некои работи, од каде доаѓаат.
Дијагностичките мерки кај нас се уште не се добри, меѓутоа најважно е што има поголема свест кај докторите, додава Антовска.
Целиот разговор погледнете го во продолжение:
Гостинката вели дека е задоволна што бил набавен апарат кој многу кошта, но сепак вели дека анализите целосно не се точни.
Штета е да го имаме апаратот, а да не го применуваме. Тоа е важно ефикасноста на третманот, да се види дали терапијата делува, вели Антовска.
Таа објаснува дека била на дополнителни третмани во Виена, а најголем страв ѝ бил „стравот од неочекуваното“. Објаснува дека најголем шок ѝ бил коментарот на докторот како одговор на прашањето „што ако терапијата не ја прими како што треба“, тој ладнокрвно рекол: „Па ако не ја прими како што треба, ќе умре“.