На Јутуб каналот „Revontulet69“ се појави видео на кое се гледа вчерашното доаѓање на силното невреме што го зафати Загреб. Видеото го снимила Клер Јасмин Спајк, писателка која живее во Загреб.
На видеото што трае 10:36 минути се гледа доаѓањето на темните облаци над Загреб, а потоа и засилувањето на олујата што вчера ја погоди континентална Хрватска.
Невремето што во средата попладне ја зафати Хрватска предизвика голема материјална штета во главниот град, одзеде два животи во Загреб и еден во Славонија, а десетици лица беа повредени.
Невремето пропратено со дожд и бурен ветер во Загреб носеше сè пред себе. Двајца мажи, 50-годишен пешак и 48-годишен возач, загинале на местото на несреќата поради паѓање на дрво, а животот го загубил и 40-годишен маж од општината Черник во Бродско-посавската жупанија, кога врз неговиот автомобил паднало дрво.