(Видео) Основач на „Алибаба“ Џек Ма го испроба ноќниот живот во Србија

Кинескиот милијардер и основач на „Алибаба“ Џек Ма е во Белград и синоќа го испроба ноќниот живот во српската престолнина. Зошто милијардерот е во Србија и на чија покана дошол се уште не се знае, но факт е дека неколку српски приватни компании како и државни институции и функционери имаат деловни контакти со „Алибаба“, пишува Блиц.

Милијардерот е „фатен“ во престижен белградски клуб, а како што може да се види на видео кое кружи во Србија, Џек Ма е опкружен со „прскалки“. Со кренати раце уживаше во домашни и странски хитови.

Се уште не е позната причината зошто познатиот милијардер е во Србија, но се претпоставува дека дошол на нечија покана, имајќи предвид дека неговата компанија има неколку деловни контакти во Србија.

Блиц наведува дека неодамна во посета на „Алибаба“ беше министерот за трговија Томислав Момировиќ, а „Алибаба“ во неколку наврати изрази голем интерес за соработка со Поштата на Србија, за што беше и јавно разговарано.

„Во април, при посетата на седиштето на компанијата во Хангжу, го претставив потенцијалот на Србија кога се во прашање нашите производи и услуги, развојот на ИКТ секторот. Потоа разговаравме за понатамошна соработка на полето на е-трговијата и силно верувам дека соработката со ‘Алибаба’ ќе отвори нови врати за развој на е-трговијата во Србија. Србија е отворена за соработка со секој кој преку својот бизнис би ја подобрил нашата земја и економското опкружување. Работиме на потпишување на Договорот за слободна трговија со Кина до крајот на годинава, по што очекуваме уште поголем интерес од кинеските компании за водење бизнис во нашата земја, како и официјални посети на многу делегации. Србија во наредните години сигурно ќе стане бизнис центар во Европа за многу светски компании – изјави за „Блиц Бизнис“ Томислав Момировиќ, министер за надворешна и внатрешна трговија.

Зоран Ѓорѓевиќ, вршител на должноста директор на ЈП „Пошта Србија“ за „Блиц Бизнис“ изјави дека од медиумите дознал дека тој е мозокот на „Алибаба“ во Белград.

„Ниту јас, ниту некој од Поштата немаме договорено со него. Од Владата не сум информиран дека треба да има официјална средба. Можеби подоцна, за време на неговиот престој во Белград, ќе биде организирана официјална средба преку кинеската амбасада, но засега такво нешто нема. Морам да кажам дека би сакал да се сретнам со него бидејќи неодамна испратив писмо до претставниците на ‘Алибаба’, преку кинеската амбасада, поради проблемите што се случуваат со кинеските пратки во Србија. Имено, пакетите најчесто се испраќаат како писма и не можеме да ги следиме, па клиентите ни се жалат иако не сме одговорни за таквата ситуација. Се надевам дека ќе врати убави спомени и му посакувам убаво да си помине и од неговата посета да имаат корист српските ресторани и сите што ќе го угостат деновиве – вели директорот на Пошта.