Сојузниците на НАТО ќе ја засилат помошта за Украина бидејќи рускиот претседател Владимир Путин ја користи зимата како оружје за војна, бидејќи неговите сили пропаѓаат на бојното поле, изјави на 29 ноември генералниот секретар на НАТО, Јенс Столтенберг.
Тој заедно со американскиот државен секретар Ентони Блинкен и министрите за надворешни работи на земјите членки на НАТО престојува во Букурешт каде што се одржува дводневен состанок на Алијансата.
„Испорачавме генератори и резервни делови, а сојузниците помагаат во обновата на уништената инфраструктура“, им рече тој на новинарите пред состанокот на министрите за надворешни работи на НАТО во Букурешт.
Тој посочи дека средбата ќе послужи како платформа за зајакнување на помошта од Западот за реконструкција на енергетската инфраструктура на Украина.
Столтенберг го повтори ветувањето што лидерите на НАТО го дадоа во Букурешт во 2008 година, во истата Палата на Парламентот каде оваа недела се состануваат министрите за надворешни работи, дека Украина, но и Грузија еден ден ќе се приклучат на Северноатлантската алијанса.
За време на дводневниот состанок, Блинкен ќе објави значајна американска помош за енергетската мрежа на Украина, соопштија американските власти. Украинската мрежа од почетокот на октомври е нападната низ целата земја со целни руски напади.
Столтенберг веќе ги повика партнерите да му ветат поголема помош на Киев во текот на зимата, додека Украина се подготвува за постудени периоди и периоди на темнина поради руските напади врз инфраструктурата.
„НАТО ќе продолжи да се залага за Украина се додека е потребно. Нема да се откажеме“, рече Столтенберг во говорот во Букурешт.
Фокусот на министерскиот состанок ќе биде зајакнување на поддршката за Украина во нејзината борба против руската инвазија.
Пред тоа, тема на средбата ќе биде зајакнувањето на помошта за Босна и Херцеговина, Грузија и Молдавија, рече Столтенберг.