Силен раст на Волстрит, во плус и азиските берзи

Цените на акциите на Волстрит забележаа силен раст во понеделникот, поттикнати од падот на цените на нафтата и приносите на американските обврзници, додека технолошкиот сектор беше меѓу главните двигатели на позитивното расположение на пазарите.

Индексот Dow Jones порасна за 0,71% и достигна 52.048 поени, S&P 500 се зголеми за 1,49% на 7.764 поени, додека Nasdaq скокна за 2,26% и достигна рекордни 27.122 поени.

Најсилен раст забележаа акциите на производителите на чипови, во услови на очекувања дека технолошките компании ќе продолжат со големи инвестиции во развојот на вештачката интелигенција.

Акциите на AMD, Intel и Arm Holdings пораснаа меѓу 10 и 17%, додека индексот PHLX Semiconductor се зголеми за 4,3%.

Од 11-те главни сектори во индексот S&P 500, осум ја завршија трговската сесија во плус. Најголем раст забележаа комуникацискиот сектор со 4,2% и информатичкиот сектор со 2,4%.

Позитивното расположение меѓу инвеститорите беше поддржано и од четвртиот последователен ден на пад на цените на нафтата, што ги зголеми очекувањата дека инфлациските притисоци би можеле да ослабнат.

Истовремено, приносот на десетгодишните американски државни обврзници падна под психолошки важната граница од 5%.

Позитивниот тренд од Волстрит се пренесе и на азиските пазари. Индексот MSCI Asia-Pacific утрово беше во плус за 0,8%.

Берзите во Индија, Австралија, Шангај, Хонг Конг и Јужна Кореја забележаа раст меѓу 0,1 и 0,9%, додека јапонската берза беше затворена поради празник.