За само еден месец собравме еден тон текстилен отпад во Кисела Вода, сподели градоначалничката Бети Стаменкоска Трајкоска.
Таа вели дека ова е јасен доказ дека граѓаните ја препознаваат важноста на селектирањето и правилното одлагање.
Посочи дека најмногу текстил е собран од контејнерот во населбата Расадник и дека во моментов се поставени 15 контејнери пред месните заедници.
„Во тек е изработка на уште 15, кои наскоро ќе бидат поставени пред училиштата и градинките. Со тоа, вкупно ќе имаме 30 контејнери за текстил низ општината. За првпат воспоставуваме систем за собирање, селектирање и рециклирање на текстилен отпад“, истакна градоначалничката.
Нагласи дека ова е резултат на соработката на Општина Кисела Вода со лиценцираната компанија ЕКО-ТЕКС ГРУП ДОО Скопје – проект кој носи и силна едукативна димензија, особено за најмладите.
„Ова не е само техничко решение. Ова е вложување во свеста, едукацијата и иднината на нашата заедница“, порача Стаменкоска Трајкоска и воедно ѝ се заблагодари на компанијата за нивната општествена одговорност и поддршката за почиста и поздрава околина.