АА на Таравари бара итна истрага за Касами по истражувањето на „Фокус“

Истражувањето објавено од „Фокус“, со наслов „Долината на волците на градоначалникот на Тетово“, отвора сериозни и аргументирани сомнежи за клиентелистички, семејни и политички врски во постапките за јавни набавки во Општина Тетово и Општина Желино, се вели во соопштението од Алијанса за Албанците (АА), крило на Арбен Таравари.

Од таму велат „Според ова истражување, градежни компании блиски до градоначалникот на Општина Тетово, Билал Касами, пратеникот Аднан Азизи, како и други функционери од актуелната власт, оствариле јавни набавки во вредност од над 6 милиони евра, што претставува јасни индиции за корупција, судир на интереси и злоупотреба на службената должност“.

„Особено загрижувачки се наводите за фаворизирање на компанијата „Мурана Компани“, сопственост на вујкото на градоначалникот Билал Касами, како и синџирските поврзаности со партнерски компании кои, според Фокус, континуирано профитирале од инфраструктурни проекти во два последователни мандати.

Сериозни правни дилеми отвора и начинот на спроведување на тендерските постапки, каде што, според истражувањето, не била побарана градежна референца или искуство, туку само минимални формални критериуми, што е спротивно на принципите на фер конкуренција и рационално користење на јавните средства.

Во правна држава, сериозните индиции документирани и објавени во медиумите ја обврзуваат Јавната обвинителство да постапи ex officio. Институционалниот молк и отсуството на реакција од страна на Општина Тетово само ги продлабочуваат сомнежите“ стои во соопштението на Алијанса за Албанците.

Од партијата бараат „итна, независна и неселективна истрага. Јавните средства не се семејна ниту партиска сопственост“.