Повторното пребројување на гласовите од парламентарните избори во Косово ја потврди победата на досегашниот премиер

Главната партија во Косово – левичарското националистичко движење „Самоопределување“ на досегашниот премиер Албин Курти, победи на парламентарните избори од 28 декември 2025 година, потврди денеска Централната изборна комисија по целосното повторно пребројување на гласовите.

Комисијата соопшти дека „Самоопределување“ добила 51,1 процент од гласовите по конечната потврда на резултатот.

Целосно повторно пребројување и иницирање кривична истрага беа наложени по откривањето на неправилности во евидентирањето на резултатите, кои засегнаа околу 70.000 гласови, пренесе БТА.

Косово влезе во политичка криза по парламентарните избори на 9 февруари 2025 година, бидејќи не успеа да состави влада, што доведе до предвремени парламентарни избори на крајот на годината.