Обвинителката Ристоска: Латас има финансиски интерес за клеветите изречени кон мене!

Драган Павловиќ Латас денеска не се појави во Граѓанскиот суд, кадешто за клевета и навреда го тужи јавната обвинителка Ленче Ристоска.

Обвинителката Ристоска во судница објасни зошто поднела тужба против Латас.

-Причината заради која дојде до оваа судска постапка е околноста што не добив извинување од страна на тужениот, туку напротив се продолжи со други медиумски и јавни напади кон мене. Ова е релевантно за судот бидејќи ја докажува намерата на тужениот дека целокупното негово делување е насочено кон нанесување на штета на мојот професионален углед и на мојата чест. Од мај до декември тужениот има објавено три тагретирани објави, полни со клевета и навреди, кои генерираат коментари од кои директно произлегува штетата нанесена на мојот професионален углед, истакна обвинителката Ристоска.

Таа дополни дека наративот на Латас потоа го пропагирала и владејачката ВМРО-ДПМНЕ.

-Она што сметам дека е значајно, наративот кој го пропагираше тужениот подоцна го прифати и Владата и не ја прифати листата на кандидати за судија во Судот во Стразбур, туку усвои нов предлог за кандидати. Во новиот предлог еден од кандидатите е истиот кога бев и јас на листата, што упатува дека клеветите ја постигнале својата цел, а тоа создавање на јавен сентимент за моја неподобност и настапена е последицата, рече обвинителката.

Таа бара обештетување, од 600.000 денари, за кое вели дека не и се за да се збогати, туку тужениот во иднина да известува објективно.

-Мојата цел не е да се збогатам, туку износот кој го побарувам на име штета сметам дека е пропорционален со штетата која ми е нанесена и неопходен за да тужениот во иднина, како новинар, да започне да известува објективно. Она што сметам дека е дополнително значејно, е што сега во јануари, повторно имаше таргетирана објава во која користеше навредливи зборово, како: дно и стручно и човечко, зомби карикатура… и за ваквото однесување побарав извинување, но не го добив, кое е значајно за целиот контекст и намерата на тужениот кон моја лична и професионална дискредитација, истакна обвинителката.

Таа заклучи дека ваквиот напад на Латас кон неа резултирал и со лична корист.

-Крајно, она што сакам да го адресирам до судот е што сметам дека во конкретниот случај тужениот има и личен бенефит од изнесувањето на вакви клевети за мене. Го известувам судот дека против мене подолг период се води негативна кампања од ВМРО-ДПМНЕ, но токму од политичката партија зетот на тужениот е предложен и избран за член на Советот на АВМУ, каде месечните примања се 4 просечни плати или речиси 2.900 евра. Оттука сметам дека тужениот имал и личен и финансиски интерес за моја дискредитација, заклучи обвинителката.

Нејзината адвокатка Павлина Зефиќ истакна дека доставува докази кои сведочат за клеветничкото однесување на тужениот.

-Првиот клеветнички навод е дека Агенцијата за борба против корупцијата утврдила дека обвинителката неовластено зела, 10.000, 100.000 евра, а втората клевета дека нема доволно стаж за да биде кандидат за судија во Европскиот суд за човекови права. На овие две околности, доставуваме докази и тоа писмено произнесување од ДКСК дека истата не водела постапка на околност дали тужителката примила 100.000 евра за надоместоци, како и листата за стаж на тужителката, рече Зефиќ.

Таа додаде дека оттука не држи оправдувањето на тужениот дека станува збор за пренесени вести, а тужителката не демантирала.

-Она што повеќе загрижува што овој наратив допира до многу поширока јавност, бидејќи и тужениот е јавна личност, со голема публика, која неговите тврдења ги зема за вистинити. Има коментари кои може да се окаректеризираат како говор на омраза, заклучи Зефиќ.

Повеќе на фокус мк