Огромни бранови однесоа туристи во морето кај Тенерифе, жртвите се бројат

На западната страна од островот Тенерифе, огромен бран ги однесе туристите во морето, три лица загинаа, три други се повредени, а едно лице е исчезнато.

Вистинската драма се одвиваше на познатиот остров, а инцидентот се случи во популарен природен базен во близина на Лос Гигантес во регионот Сантијаго дел Теиде.

Кога дојдоа големите бранови, пливачите беа и на карпите и во водата. Според службите за итни случаи на Канарските Острови, неколку лица беа однесени во морето, а едно лице сè уште е исчезнато.

Според „Диарио де Ависос“, меѓу жртвите се неколку странски туристи.

„Хеликоптер за спасување на море спаси едно лице од водата и пронајде тело“, соопштија службите за итни случаи на Канарските Острови.

Според властите, двајца мажи и една жена ги загубија животите. Властите на Канарските Острови веќе предупредија на опасни бранови во неделата, по она што се случи на почетокот на ноември, кога три лица загинаа, а 15 беа повредени.