„Данас“: Профитот на банките во Србија расте од 2021 година

Банкарскиот сектор во Србија е обележан со два тренда во изминатите пет години – намалување на бројот на банки и зголемување на профитабилноста. Во споредба со 2019 година, бројот на банки во Србија се намали од 26 на 19 оваа година. Од друга страна, профитабилноста е повеќе од двојно зголемена, објави весникот „Данас“.

Банките во Србија остварија нето добивка од 774 милиони евра во првата половина од 2025 година. Во споредба со првата половина од лани, профитот се зголеми за само 1,78 проценти. Во целата 2024 година, нето добивката на банкарскиот сектор пред плаќање даноци изнесуваше 1,5 милијарди евра.

Според анализата на банкарскиот сектор од специјализираниот портал Bankarskimonitor.rs, повратот на капиталот во српските банки во првата половина од оваа година изнесуваше 20,33 проценти.

Од 2020 година, која беше најлошата година во последната половина деценија, банките бележат речиси фантастичен раст на повратот. Во пандемиската 2020 година, профитот на банките изнесуваше околу 350 милиони евра, повратот на активата беше „само“ 6,24 проценти, што значи дека се зголемил тројно за пет години.

Една година претходно, во 2019 година, профитот беше 540 милиони евра, а повратот на капиталот беше 9,48 проценти.

Во првите шест месеци од оваа година, според анализата највисок поврат на капиталот (ROE) постигнаа малите банки – API (43,8 проценти), Adriatik banka (40,7 проценти) и Банка на Кина (40 проценти).

Тие три банки имаа и највисок поврат на капиталот лани. Од друга страна, во првата половина од оваа година, две банки забележаа загуба, Yetell и Mirabank (ова е банка која губи секоја година од 2019 година).

Освен нив, трите банки со најнизок поврат на капиталот беа турската Халкбанка (7,96 проценти), Адико банка (8,94 проценти) и Прокредит банка (12,52 проценти).

Во сите 6,5 години, единствената банка која работеше позитивно и постигна надпросечни резултати беше Рајфајзен банка, која минатата година беше банката со највисок профит во Србија. Таа банка имаше просечен поврат на капиталот во овие 6,5 години од 19,2 проценти.