Додик и официјално веќе не е претседател на Република Српска

Апелациониот оддел на Судот на Босна и Херцеговина ја отфрли жалбата на Милорад Додик против одлуката на Централната изборна комисија (ЦИК) со која му беше одземен мандатот како претседател на Република Српска.

На овој начин, како што пишуваат сараевските медиуми, Додик официјално повеќе не е на таа позиција, а ЦИК е должна да распише предвремени избори за претседател на ентитетот.

Патем, ЦИК претходно донесе одлука за престанок на неговиот мандат, но таа можеше да стапи на сила дури откако ќе стане правно обврзувачка, односно потврдена од Апелациониот оддел на Судот на Босна и Херцеговина. Денешната одлука правно утврди дека Додик повеќе не ја извршува функцијата претседател на РС.

Иако адвокатите на Додик тврдеа дека постојат законски основи за поништување на одлуката, судот ја отфрли нивната жалба. Со ова се отстрани последната пречка за распишување предвремени избори во ентитетот Република Српска.

Сепак, денес од Бања Лука, Додик најави одржување референдум на крајот на септември, на кој граѓаните на РС треба да одговорат дали прифаќаат дека високиот претставник во БиХ донесува одлуки и дали ја признаваат пресудата со која тој беше разрешен.

Во истото обраќање, Додик рече дека нема да има предвремени избори во РС, иако сега е јасно дека ЦИК ќе биде должна да ги распише.