Фаворитот на Трамп за нов претседател на ФЕД бара „превентивно“ намалување на каматните стапки

Високиот функционер на Федералните резерви на САД (ФЕД), Кристофер Волер, повторно повика на намалување на каматните стапки на крајот на јули, и покрај стабилните економски индикатори и противењето на другите членови на ФЕД кои веруваат дека е прерано за тоа.

Волер, кој беше назначен во ФЕД од страна на американскиот претседател Доналд Трамп во 2020 година, рече дека намалувањето на референтната стапка за 25 базични поени сега би било оправдано со цел да се зачува силата на пазарот на трудот пред да се случи пад, објавува CNN.

Неговиот став е во спротивност со мнозинството членови на ФЕД кои веруваат дека треба да почекаат и да видат како царините на Трамп ќе влијаат на инфлацијата пред да направат каков било потег.

Волер се смета за фаворит на Трамп за замена на сегашниот претседател на ФЕД, Џером Пауел, кого Трамп остро го критикува затоа што е против намалување на каматните стапки. Претседателот на САД објави дека наскоро ќе го именува својот кандидат за претседател на ФЕД.

Министерот за финансии во администрацијата на Трамп, Скот Бесент, изјави дека формалниот процес на избор на нов претседател на ФЕД е започнат, а Трамп изјави дека името на кандидатот ќе биде објавено „многу наскоро“.

Други претставници на ФЕД изјавија дека засега нема потреба од промена на политиката бидејќи инфлацијата расте, а вработеноста останува силна. Во јуни беа регистрирани 147.000 нови работни места, а невработеноста падна на 4,1 процент.

Сепак, Волер предупредува дека пазарот на трудот се чини дека е „на работ“ и дека ФЕД треба да реагира превентивно.  Иако повеќето економски индикатори не укажуваат на итна потреба од намалување на каматните стапки, Волер и неколку други претставници продолжуваат да се залагаат за проактивна политика на олабавување, пренесува Бизнис.рс.